Ásta Magnúsdóttir, ráðuneytisstjóri mennta- og menningarmálaráðuneytisins, segir að tröll hafi stolið árshátíð starfsmanna stjórnarráðsins. Þetta segir hún við Björn Malmquist, fréttamann RÚV, í leiknu myndbandi sem sent var á starfsmenn. Fréttablaðið greindi fyrst frá þessu.
Líkt og greint var frá í morgun stóð til að halda árshátíðina þann 6.október en árshátíðinni var frestað vegna afskipta Katrínar Jakobsdóttur forsætisráðherra og Lilju Alfreðsdóttur menntamálaráðherra sem vildu ekki halda hana á 10 ára afmæli bankahrunsins.
Sjá einnig: Katrín og Lilja setja djammbann – Engin árshátíð í Stjórnarráðinu vegna afmælis hrunsins
Nokkur óánægja gætti meðal starfsmanna vegna þessa og er óánægjunni slegið upp í myndbandinu.
Tröllin eru frá sýningu Egils Snæbjörnssonar frá Feneyjartvíæringinn í fyrra. Þau eru sett við hlið mynda af Katrínu Jakobsdóttur forsætisráðherra, Lilju Alfreðsdóttur menntamálaráðherra og Bjarna Benediktssonar fjármálaráðherra og sagt að þau séu tröllin sem stálu árshátíðinni.
„Ég sá sjálf undir hælana á þessum tveimur tröllum á leiðinni hér út úr húsinu. Ég þekki þau vel. Þetta er ófyrirleitni af einhverju tagi sem ég hef ekki þekkt áður. Ég er miður mín,“ segir Ásta í myndbandinu. Annar starfsmaður lýsir tröllunum sem „viðurstyggilegum verum“, andfúlum og með nef sem minni helst á maðkaða kartöflu.
Hér má sjá myndbandið í heild sinni:
Árshátíðin fer fram þann 6. apríl 2019.