Ingi Rafn Ragnarsson, sonur Ragnars Lýðssonar sem ráðinn var bani síðastliðið vor, segir að hann og systkini sín hafi ekki fengið frið frá því föður þeirra var ráðinn bani vegna skipulagðrar áróðursherferðar af hálfu ættingja og fjölskylduvina. Valur Lýðsson, bróðir Ragnars, var í dag dæmdur í 7 ára fangelsi fyrir að hafa orðið honum að bana.

„Í svona borðliggjandi morðmáli, þar sem öll sönnunargögn beinast að öðrum aðilanum og sýna sífellt betur hversu tilhæfulaus, gróf og óvænt árásin á föður okkar var, þá teldi fólk að það yrði frekar fámennur hópur sem kæmi saman til nauðvarnar og hæfi persónuárásir í garð fórnarlambsins. Því er ekki fyrir að fara í tilfelli okkar systkinanna,“ segir Ingi Rafn í færslu á Fésbók. Hann segir að sögur hafi verið búnar til með það að markmiði að sverta föður þeirra:

„Stór hópur fólks úr Biskupstungum, okkar heimasveit, nokkrir gamlir vinir föður míns og megnið af föðurættingjum mínum (að frátöldum nokkrum sem eru teljandi á fingrum annarrar handar) hafa stundað grófar persónuárásir á æru föður míns. Jafnframt hafa þau algjörlega neitað að meðtaka sönnunargögnin, sem sýna hvert á fætur öðru hvernig atburðarásin var þetta örlagaríka kvöld. Sumir ættingjar okkar hafa látið sér nægja að tína til ýmsar ástæður fyrir því hvernig þetta væri Ragnari föður mínum að kenna og alls ekki við Val að sakast. Aðrir gengið töluvert lengra.“