Framundan er aðalmeðferð í Landsrétti í máli Thomasar Möller Olsen, sem hlaut 19 ára fangelsisdóm fyrir morðið á Birnu Brjánsdóttur og fíkniefnabrot í héraði. Thomas krefst sýknu í málinu og að ákæruatriðum er varðar stórfellt fíkniefnalagabrot verði vísað frá dómi. Dagsetning aðalmeðferðar hefur ekki verið ákveðin en dómari metur nú kröfur ákæruvaldsins og verjanda og mun fljótlega taka ákvörðun um hverjir verða kallaðir til skýrslutöku fyrir Landsrétti.
Í vikunni fór fram undirbúningsþinghald vegna málsins en þar var greinargerð verjenda Olsens, Björgvins Jónssonar, lögð fram. Þar kemur í ljós hvernig vörninni fyrir Landsrétti verður hagað.
Í stuttu máli byggist vörn Björgvins á því að „mikið ósamræmi“ sé í frásögn lykilvitnis, Nikolaj Olsen, um veigamikil atriði við yfirheyrslu lögreglu. Þá heldur Björgvin því fram að aðild Nikolaj hafi verið mun meiri en hann lét í ljós við yfirheyrslur og í réttarsal.
DV fer yfir hvernig verjandi Thomasar freistar þess að fá hann sýknaðan.
Nikolaj keyrði á brott með Birnu
Atburðarrásin sem Björgvin leggur upp með er að Thomas hafi ekið rauðri Kia Rio-bifreið, með Birnu og Nikola innanborðs, upp að golfskála Golfklúbbs Garðabæjar og Kópavogs og síðan brugðið sér út að pissa. Á meðan hann athafnaði sig hafi Nikolaj ekið bílnum á brott. Þegar Nikolaj sneri tilbaka var Birna ekki í bílnum og hafi Nikolaj útskýrt það þannig að Birna byggi þarna rétt hjá og að hún hafi ætlað að labba heim.
Þessum framburði er fléttað saman við myndskeið úr eftirlitsmyndavél á golfskála Golfklúbbs Kópavogs og Garðabæjar við Hnoðraholt í Garðabæ. Þar sjáist lágvaxinn maður keyra bílinn og enginn situr í hægra sæti bílsins. Bendir Björgvin á að Thomas er 1.88 sentímetrar á hæð en Nikolaj 1.71 sentímetrar.
Rétt er að geta þess að ákæruvaldið telur útilokað að atburðarrásin umrædda nótt hafi verið á þess leið. Þá gefi myndskeiðin ekkert til kynna um hæð viðkomandi né hvort að einhver hafi verið í hægra framsæti bifreiðarinnar.
Blóðug úlpa of lítil til að vera í eigu Thomasar
Um borð í Polar Nanoq fannst blóðug úlpa sem var sögð vera í eigu Thomasar. Hann hefur því fram að það sé rangt því að umrædda úlpa er í stærð M og því passi hann ekki í hana, verandi hávaxinn og þrekinn. Fram kemur að Thomas eigi samskonar úlpu í stærðinni XL. Óskar verjandinn eftir því að Thomas verði látinn máta úlpuna í réttarsal.
Nikolaj laug til um að hafa verið sofandi í bílnum
Þá er því haldið fram í greinargerð málsins að Nikolaj ljúgi því að hann hafi verið sofandi í Kia Rio-bifreiðinni frá miðbæ Reykjavíkur og að Polar Nanoq við Hafnarfjarðarhöfn. Haft er eftir Thomasi að Nikolaj hafi beðið hann um að aka sér að Goldfinger í Kópavogi og að auki hafi verið reynt að hringja tvisvar úr síma Nikolaj klukkan 06.03 og 06.04 umrædda nótt. Þá megi merkja af myndskeiðum við höfnina að Nikolaj hafi ekki verið jafn drukinn og hann hafði greint frá við yfirheyrslur og fyrir dómi.
Þá gagnrýnir Björgvin það harðlega að ekki hafi verið reynt að ná tali af vini Nikolaj sem hann var sagður hafa hringt í umrædda nótt. Nikolaj hefur viðurkennt að hann hafi verið grátandi í símann og því gæti vinurinn búið yfir mikilvægum upplýsingum.
Leiða að því líkum að Nikolaj hafi komið fingrafari fyrir
Allt er gert til þess að gera framburð Nikolaj ótrúverðugan. Minni hans er sagt vera valkvætt eftir því hvað henti rannsakendum málsins og að það sé mjög ótrúverðugt. Þá er bent á að Nikolaj hafi verið yfirmaður á Polar Nanoq og því haft lyklavöld að öllum káetum skipsins. Í því ljósi er leitt að því líkum að hann hafi getað komið því í kring að fingrafar Thomasar fannst á ökuskírteini Birnu sem fannst um borð í skipinu.
Heldur hann því fram að ekki sé „eitt einasta“ sönnunargagn sem styður við þá kenningu að Thomas hafi ekið þá leið sem hann þurfti að fara frá Hafnarfjarðarhöfn til Óseyrarbrúar, þar sem óumdeilt er að Birnu hafi verið komið í sjóinn.
Útlendingur gæti ekki hafa þekkt leiðina að Óseyrarbrú
Í greinargerðinni er miklu púðri eytt í akstur Kia Rio-bifreiðarinnar frá Hafnarfjarðarhöfn að Óseyrarbrú. Er því haldið fram að útlendingur,líkt og Thomas, hafi aldrei átt að geta ratað á þessa leið því hún væri flestum hulin. Leiðin liggur í gegnum íbúðarhverfi og vill verjandi Thomasar meina að aðeins mjög vel kunnugir myndu keyra þessa leið.
