Kraftlyftingamaðurinn og leikarinn Hafþór Júlíus Björnsson, oft kallaður Fjallið, keypti í vikunni eigin íbúð í Kópavogi á uppboði. Íbúðin var sett á nauðungarsölu að ósk fyrrverandi sambýliskonu hans sem liður í fjárhagslegu uppgjöri þeirra í kjölfar sambandsslitanna. Þau keyptu eignina í september 2016 og var Hafþór skráður fyrir 80% hlut í fasteigninni, 150 fermetra parhúsi í Kópavogi, en hans fyrrverandi 20%. Nauðungarsölunni lauk eins og áður segir með því að Hafþór keypti íbúðina fyrir 66,7 milljónir króna eftir samkeppni við aðra fjárfesta. Stundin greinir frá þessu.
Eins og áður hefur komið fram í fréttum kærði sambýliskonan fyrrverandi Hafþór fyrir frelsissviptingu árið 2017. Um svipað leyti stigu þrjár konur fram í Fréttablaðinu og lýstu líkamlegu og andlegu ofbeldi af hendi hans. Meðal annars barnsmóðir Hafþórs. Í tengslum við umfjöllunina sagði Hafþór að fréttaflutningur af málinu yrði kærður til lögreglu. „Þetta eru meiðyrði og verður alveg 100 prósent kært.“ Í frétt Stundarinnar staðfestir lögfræðingur Hafþórs að engin kæra hafi enn verið lögð fram.
Í DV í dag kom fram að Hafþór giftist á dögunum unnustu sinni, hinni kanadísku Kelsey Henson. Líkt og DV greindi frá í dag þá undirrituðu hjónin samning sem meðal annars innihélt ákvæði um ásakanir og varnir gegn þeim. Þá var umrædd íbúð auk annarra eigna Hafþórs skráð sem séreign hans.