Hin 22 ára gamla Fern Jackson varð fyrir miklu áfalli í verslun IKEA í Bretlandi eftir að hafa borðað pylsu. Fern sem aldrei hefur borðað kjöt áður stóð í þeirri meiningu að hún væri að borða grænmetispylsu varð að eigin sögn veik í tvo daga eftir atvikið og upplifði mikið andlegt áfall.
Breski vefurinn Unilad fjallar ítarlega um málið þar sem fram kemur að forsvarsmenn IKEA í Bretlandi hafi beðið Fern afsökunar og viðurkennt mistök. „Ég pantaði grænmetispylsu á veitingastaðnum og þegar hún kom leit hún út eins og sú pylsan sem ég hafði bent á. Ég setti tómatsósu á pylsuna og tók bita, þá áttaði ég mig á því að ekki var allt með felldu,“ sagði Fern.
„Ég var svo reið, þetta er í fyrsta sinn sem kjöt fer inn fyrir mínar varir. Ég hef aldrei borðað kjöt eða fisk. Meira að segja mamma mín var grænmetisæta þegar hún gekk með mig,“ sagði Fern sem hefur óskað eftir því við IKEA að það verði tryggt að atvik sem þessi geti ekki komið fyrir aftur.
Hún segir bitann hafa haft mikil áhrif á andlega og líkamlega heilsu. „Líkaminn minn er ekki vanur kjöti svo hann sýndi mikil viðbrögð í heila tvo daga. Ég var í andlegu áfalli eftir þetta. Mér hefur aldrei hugast það að borða eitthvað sem hefur verið á lífi þannig að þetta var hræðileg lífsreynsla,“ sagði Fern.
https://www.instagram.com/p/BnJGxptl0cH/?taken-by=ikeafoodservices