Vísitala íbúðaverðs lækkaði um 0,1% í ágúst samkvæmt nýbirtum tölum Þjóðskrár Íslands og hefur hækkað um 4,1% undanfarna 12 mánuði. Þetta kemur fram í tilkynningu frá Íbúðarlánasjóði en áfram hægir á verðhækkunum íbúða á höfuðborgarsvæðinu. Í júlí mældist árshækkun íbúðaverðs 5,2%. 12 mánaða hækkunartaktur íbúðaverðs nú er sá minnsti í rúmlega sjö ár eða frá því í maí 2011.

Verð fjölbýlis var óbreytt milli mánaða í ágúst en sérbýli lækkaði í verði um 0,3%. Fjölbýli hefur hækkað um 3,2% í verði á undanförnu ári en sérbýli um 6,0%.

Samkvæmt þessu hefur raunvirði íbúðaverð aðeins hækkað um 1,4% undanfarna 12 mánuði ef vísitala íbúðaverðs er borin saman við vísitölu neysluverðs. Um talsverða breytingu á þróun raunverðs er að ræða og hefur sú breyting átt sér stað á skömmum tíma. Til samanburðar þá mældist árshækkun íbúðaverðs að raunvirði 21,5%. Þrátt fyrir að hægt hafi á verðhækkunum er raunverð íbúða enn hátt í sögulegu samhengi eða um 4% hærra en þegar það var hæst í síðustu uppsveiflu árið 2007.

Þrátt fyrir þetta er sala með ágætu móti en 728 kaupsamningum vegna íbúða var þinglýst í ágúst sem eru um 15% fleiri samningar en í júlí og 46% fleiri samningar en í ágúst í fyrra.

Undanfarna 12 mánuði, frá september 2017 til ágúst 2018, var hins vegar nokkurn veginn jafn mörgum kaupsamningum þinglýst eins og síðustu 12 mánuði þar á undan.