Fjórðungur lögreglumanna telur sig ekki vera öruggan í starfi samkvæmt því sem kemur fram í ársskýrslu dómsmálaráðherra. Markmið ráðuneytisins er að níu af hverjum tíu lögreglumönnum telji sig örugga við skyldustörf.

Fréttablaðið skýrir frá þessu í dag. Haft er eftir Snorra Magnússyni, formanni Landssambands lögreglumann, að félagið hafi margoft bent á leiðir til að auka öryggi lögreglumanna en ljóst sé miðað við könnun frá því í fyrra að bæta þurfi úr málunum og þetta tengist því sem Landssambandið hefur margoft sagt.

„Það þarf að fjölga lögreglumönnum. Við teljum það vera meginskýringuna á þessu.“

Er haft eftir Snorra. Í fyrrnefndri könnun sögðu 74 prósent lögreglumanna að þeir teldu sig örugga í starfi.