Johannes Gijsen, biskup kaþólsku kirkjunnar á Íslandi á árunum 1996 til 2007, er sagður hafa hylmt yfir kynferðisbrot starfsmanna kirkjunnar. Hann er sjálfur sagður hafa brotið kynferðislega á tveimur drengjum.

RÚV greinir frá þessu og vitnar í hollenska blaðið NRC. Í úttekt blaðsins kemur fram að Johannes hafi ítrekað fært til prest í starfi sem vitað var að hafi brotið á börnum í Maastricht. Sá prestur hélt áfram að níðast á börnum. Johannes er sagður hafa fært annan prest í starfi en sá er sagður hafa brotið á altarisdreng. Hann er enn fremur sagður hafa vígt prest sem hlotið hafði dóm fyrir kynferðisbrot gegn fimm ára stúlku.

Líkt og fyrr segir hefur Johannes sjálfur verið sakaður um kynferðisbrot en í hollenskum miðlum kom fram að kirkjuyfirvöld hafi vitað af því þegar hann tók við embætti biskups á Íslandi. Jóhannes lést árið 2013 og ári síðar staðfesti nefnd innan kirkjunnar að hann hafi brotið gegn tveimur drengjum.

Rannsóknarnefnd, sem skipuð var af kaþólsku kirkjunni á Íslandi, komst síðar að þeirri niðurstöðu að Jóhannes hafi hylmt yfir ásakanir um kynferðislegt ofbeldi séra Ágústs Georgs, skólastjóri Landakotsskóla og Margretar Muller, kennara við sama skóla.