Hallgrímur Helgason rithöfundur bendir á að fréttir morgunsins beri það varla í för með sér að #metoo herferðin hafi átt sér stað hér á landi. Kynferðislegt ofbeldi og misbeiting valds grasseri víða í samfélaginu og sjaldan þurfa gerendur að taka ábyrgð á brotunum.

„Enn einn mánudagsmorgunninn í #metoo-vegferðinni en óvenju athyglisverður.

Hollendingar segja okkur frá enn fleiri syndum fyrrum biskups og barnaníðings í Landakoti.

Á sama tíma er þess minnst að eitt ár frá því að upp komst að tveir ráðherrar Sjálfstæðisflokksins hylmdu yfir með alræmdum barnaníðingi,“

ritar Hallgrímur í opinni færslu á facebooksíðu sinni.

Nú í morgun greindi DV frá því að Áslaug Thelma Einarsdóttir, eiginkona Einars Bárðarsonar og fyrrverandi forstöðumaður markaðs- og kynningarmála hjá Orku náttúrunnar, hefði í hyggju að leita réttar síns vegna uppsagnar hennar hjá Orku náttúrunnar á dögunum. Líkt og hefur komið fram þá telur hún uppsögn sína tengjast því að hún hafi bent á óviðeigandi framkomu fyrrverandi forstjóra félagsins, Bjarna Más Júlíussonar.

„Og svo stígur fram konan sem rekin var frá ON í liðinni viku og opinberar karlrembustjórn forstjóra OR,“

ritar Hallgrímur jafnframt og bendir á þrátt fyrir að öll þessi mál hafi komið upp á yfirborðið þá sé ennþá verið að hylma yfir brotin.

„Sá fyrsti í þessari upptalningu situr nú á sínum stað fyrir handan, hin tvö sitja enn sem ráðherrar í boði kvenfrelsisflokksins og sá þriðji á sínum stað í boði vinstrimeirihlutans í borgarstjórn,“

ritar Hallgrímur og bætir við að lokum að íslenska samfélagið eigi augljóslega langt í land hvað þessi mál varðar.