Á tíunda tímanum í gærkvöldi þurftu björgunarsveitarmenn að ferja erlenda ferðamenn í land úr Gróttu. Fólkið hafði verið þar við norðurljósaskoðun en gætti ekki að sjávarföllum og komst ekki í land þegar flætt hafði að.

Á fyrsta tímanum í nótt var akstur konu stöðvaður í Kópavogi. Hún hafði engin skilríki meðferðis og gaf lögreglumönnum upp ranga kennitölu. Á endanum fékkst þó rétt kennitala upp úr henni og reyndist hún þá vera svipt ökuréttindum. Hún mun ítrekað hafa gefið upp ranga kennitölu. Konan var einnig kærð fyrir skjalafals því bifreiðin reyndist vera með stolin skráningarnúmer og því ótryggð en númerin höfðu verið tekin af samskonar bifreið sem er eins á litinn.

Um klukkan 20 var ofurölvi erlendur ferðamaður handtekinn við Alþingishúsið. Hann gat ekki gert grein fyrir sér né hvar hann heldur til hann var því vistaður í fangageymslu.

Þrír ökumenn voru hanteknir í gærkvöldi og nótt grunaðir um akstur undir áhrifum fíkniefna. Tveir þeirra reyndust vera sviptir ökuréttindum og hafa áður verið stöðvaðir við akstur þrátt fyrir að vera sviptir ökuréttindum.

Tveir ökumenn voru handteknir í nótt grunaðir um ölvun við akstur.

Á níunda tímanum í gærkvöldi varð umferðarslys við Víðinesveg. Þar var bifreið ekið útaf veginum. Ökumaðurinn kvartaði undan eymslum í baki. Hann var fluttur á slysadeild með sjúkrabifreið og bifreið hans fjarlægð með dráttarbifreið.