Íbúar á lítilli eyju fyrir utan strendur Skotlands eru í uppnámi eftir að fyrsti glæpurinn var framinn þar í 20 ár. Eyjan Gigha hefur verið þekkt sem „glæpalausa eyjan“ og auglýsti stolt að síðasti glæpurinn hafi verið framinn fyrir 20 árum þegar reiðhjóli var stolið.
Glæpurinn nú er öllu alvarlegri, rúmlega 300 þúsund krónum í reiðufé var stolið af hótelinu.
„Það var fullt hótel. Fólk í herbergjum og úti á bátum. Við erum öll í áfalli, þetta er eyja þar sem allir þekkja alla. Nú þurfum við að setja upp öryggismyndavél,“ segir Arthur Katilius, veitingastjóri á hótelinu í samtali við breska dagblaðið Metro. 160 manns búa á eyjunni.
Eyjan hefur áður verð í fréttum, árið 2002 keyptu íbúarnir eyjuna í sameiningu þegar landeigandinn setti hana á sölu. Hinn 82 ára Willie McSporran, sem var aðalhvatamaður þess á sínum tíma að íbúarnir eignuðust eyjuna, er miður sín vegna þjófnaðarins: „Það er skelfilegt að svona sé að gerast eftir öll þessi ár. Síðasti glæpurinn sem átti sér stað hér var fyrir 20 árum þegar reiðhjóli var stolið af bróður mínum.“