Bjarni Már Júlíusson, framkvæmdastjóri Orku náttúrunnar, sem var í fyrradag rekinn fyrir óviðeigandi hegðun, mun fá tæplega 15 milljónir króna vegna starfsloka.
Fréttablaðið greinir frá því að hann muni fá laun næstu sex mánuðina. Samkvæmt ársreikningi Orkuveitu Reykjavíkur eru mánaðarlaun framkvæmdastjóra þriggja dótturfélaga, þar á meðal Orku náttúrunnar, rúmar 2,4 milljónir á mánuði.
Einar Bárðarson, upplýsingafulltrúi Hafnarfjarðarbæjar, skrifaði færslu sem vakti mikla athygli í fyrradag en hún varðaði framkvæmdastjóra sem hafði sýnt af sér dónalega hegðun. Framkvæmdastjórinn sem Einar skrifaði um er títtnefndur Bjarni Már.
Bjarni Már tjáði sig einungis við einn fjölmiðil í gær, mbl.is, en svo vill til að í því viðtali rekur hann brottvikninguna til fréttar sem birtist á vef Smartlandsins. Hann sagði að hann hafi gert mistök í samskiptum við undirmenn. Hann hafi sent tölvupóst á þær konur sem tóku þátt í Wow-hjólreiðakeppninni á vegum fyrirtækisns. Þar deildi hann frétt á vef Smartlandsins, undirsíðu mbl.is, með fyrirsögninni „Hjólreiðar bæta kynlífið“ og sagði: „Þetta grunaði mig“.