Undanfarna daga hefur félag sem gengur undir nafninu Flóttamenn án landamæra sent frá sér valgreiðsluseðla í heimabanka þar sem fólki gefst kostur á að styrkja félagið um rúmar 2.000 krónur. Engar upplýsingar eru til um félagið á internetinu og Rauði Krossinn kannast ekki við félagið. 

Sigurður Brynjar Guðlaugsson er samkvæmt vefsíðu Ríkisskattstjóra skráður stjórnarformaður samtakanna. Sigurður hlaut sjö mánaða langt fangelsi árið 2016 fyrir að aka í þrígang án ökuréttinda. Sigurður tók við formennsku fyrr á þessu ári.

Félagið var stofnað þann 15. júní 2017

Í lok maí á þessu ári voru svo gerðar breytingar á félaginu en þá komu þeir Grétar Sigurðarson, Alexander Kjartansson og Vignir Þór Þórsson inn í félagið. Grétar vildi lítið kannast við félagið þegar DV ræddi við hann í dag, þrátt fyrir að vera skráður í stjórn félagsins sem meðstjórnandi kvaðst Grétar ekkert vita um félagið. „Ég er bara varamaður í stjórn þessa félags og veit ekkert um þetta. Hef ekki einu sinni atkvæðarétt,“ sagði Grétar í samtali við DV. Grétar tók sæti í stjórn félaginu í vor og má sjá undirskrift hans á þeim gögnum sem DV hefur undir höndum og þvertók fyrir að tjá sig um félagið eða tilgang þess sem nú hefur sent valreikninga á fjölda manns þar á meðal nokkra blaðamenn DV.

Grétar Sigurðsson hlaut tveggja og hálfs árs dóm fyrir aðild sína að líkfundarmálinu svokallaða árið 2005. Í því máli var hann sakfelldur fyrir innflutning á rúmlega 220 grömmum af amfetamíni sem Litháinn Vaidas Jucsevisius tók að sér að koma með hingað til lands. Hann lést skömmu eftir komuna til landsins eftir að pakkningar utan um fíkniefnin sprungu. Grétar, ásamt tveimur öðrum mönnum létu hjá líða að koma honum til aðstoðar og eftir að hann lést komu þeir líkinu fyrir í Neskaupstaðarhöfn.

Brynhildur Bolladóttir, upplýsingafulltrúi Rauða Krossins kannaðist ekki við félagið. „Við vitum ekkert um þetta félag,“ sagði Brynhildur í samtali við DV. Hún vildi að öðru leyti ekki tjá sig um málið. Sema Erla Serdar, Framkvæmdarstjóri hjá Solaris – hjálparsamtökum fyrir hælisleitendur og flóttafólk á Íslandi tekur í sama streng. „Ég hef aldrei heyrt um þessi samtök,“ segir Sema í samtali við DV.