Dalrún J. Eygerðardóttir sagnfræðingur leitar nú að konum sem störfuðu sem ráðskonur í sveitum landsins. Um er að ræða doktorsverkefni Dalrúnar í sagnfræði við Háskóla Íslands sem ber heitið Huldufreyjur: Ráðskonur í sveit á síðari hluta 20. aldar. Er hún sérstaklega að leita að konum sem störfuðu sem ráðskonur á árabilinu 1950 til 2000. Dalrún segir í samtali við DV að meginmarkmiðið sé að rannsaka og skrá sögu þessara kvenna.
„Ráðskonur eiga sér langa sögu í íslensku samfélagi en hún hefur lítt eða ekkert verið rannsökuð. Það er því tímabært að skoða nánar sögu ráðskvenna á fræðilegum forsendum. Áhuga minn á þessu málefni má fyrst rekja til almenns áhuga míns á kvennasögu, og þegar ég sá að þessi viðamikli hópur íslenskra kvenna í íslenskri atvinnusögu var afskiptur nánast með öllu í okkar sögu, þá lá beint við að hefjast handa,“ segir Dalrún.
Rannsóknin er í grunnatriðum tvíþætt. Annars vegar að leita svara við því hvers vegna konur gerðust ráðskonur í sveit á síðari hluta 20. aldar þegar þær höfðu mun fleiri atvinnutækifæri en áður. Hins vegar að skoða starfsvettvang ráðskvenna og upplifun þeirra af starfinu. Segir Dalrún að unnið sé út frá þeirri tilgátu að stærsti einstaki hópur íslenskra ráðskvenna í sveit á síðari hluta 20. aldar hafi verið einstæðar mæður, og að ráðskonustarfið megi að hluta til túlka sem félagslegt úrræði einstæðra mæðra á þessum tíma.
Þar sem ekkert hefur verið fjallað um störf íslenskra ráðskvenna þá er um frumrannsókn að ræða sem krefst viðamikillar yfirferðar á skriflegum heimildum. Er hún því að skoða opinber gögn, æviminningar, en rannsóknin snýr fyrst og fremst að viðtölum við konur sem störfuðu sem ráðskonur á umræddum tíma. „Það er skemmtilegt frá að segja að nú þegar hafa margar ráðskonur haft samband við mig og ég hef tekið viðtöl við stóran hluta þeirra. Hins vegar er þörf á að fá upplýsingar frá fleiri ráðskonum og því biðla ég til kvenna sem starfað hafa sem ráðskonur á síðari hluta 20. aldar að hafa samband við mig.“ Biður Dalrún því konur sem störfuðu sem ráðskonur á árabilinu 1950 til 2000 að hafa samband við hana í síma 664-7083 eða í tölvupósti dalrunsaga@gmail.com.
