Gefin hefur verið út alþjóðleg handtökuskipun á hendur 55 ára manni, Jos Brech, sem grunaður er um morðið á Nicky Verstappen fyrir 20 árum. Um er að ræða eitt umtalaðasta óleysta sakamál Hollands en Nicky þessi var ellefu ára þegar honum var rænt af tjaldsvæði í Limburg árið 1998.
Lík hans fannst skammt frá tjaldsvæðinu en hann hafði verið misnotaður kynferðislega áður en honum var ráðinn bani. Ein umfangsmesta DNA-rannsókn í sögu Hollands varð til þess að handtökuskipunin var gefin út, en rannsóknin leiddi í ljós að 100% líkur eru á því að Jos hafi verið viðriðinn morðið.
Jos Brech er fyrrverandi skáti og leikskólakennari og er hann sagður vera í felum einhvers staðar úti í óbyggðum. Síðast er vitað um ferðir hans í hinu hálenda Vosges-héraði í austurhluta Frakklands þar sem hann á fjallakofa. Hann er sagður vera mjög vanur útivistarmaður og líklegur til að geta hafist við í óbyggðum svo vikum, jafnvel mánuðum, skiptir.
Málið vakti mikinn óhug á sínum tíma, ekki síst í ljósi þess að lögreglu gekk illa við rannsókn málsins. Enginn var handtekinn grunaður um verknaðinn og því hefur morðingi Nicky gengið laus í tvo áratugi.
Það var svo í maí á síðasta ári að lögreglan ákvað að blása nýju lífi í rannsóknina þegar ráðist var í hina umfangsmiklu DNA-rannsókn. Um tuttugu þúsund karlmenn, búsettir í héraðinu þar sem Nicky var myrtur í, voru boðaðir í DNA-próf og þar af gáfu um 15 þúsund karlar sýni.
Náskyldur ættingi Jos var einn þeirra sem gaf sýni sem gaf ákveðna samsvörun við þann grunaða í málinu. Rannsókn lögreglu leiddi svo til þess að grunur féll á Jos og fékkst hann staðfestur þegar DNA-rannsókn var gerð á náttbuxum sem Jos hafði skilið eftir á heimili sínu í Hollandi. Leiddi hún til þess að 100% líkur voru á að sami maður hafði nauðgað Nicky og hafði klæðst umræddum náttbuxum.
Lögregla ræddi við Jos í þrígang á sínum tíma en hann bjó hjá móður skammt frá morðstaðnum. Lögregla ræddi við hann þegar hann var á gangi nálægt morðstaðnum eftir miðnætti, tveimur dögum eftir að líkið fannst, en þá sannfærði hann lögreglu um að hann væri einfaldlega í göngutúr.
Jos yfirgaf Holland í október á síðasta ári og hafði svo samband við ættingja sína í febrúar. Þá sagðist hann vera í Vosges í Frakklandi í veiðitúr. Aðstandendur hans tilkynntu svo í apríl að hans væri saknað, enda hafði hann ekkert látið heyra í sér síðan í febrúar. Leit franskra og hollenskra yfirvalda að honum síðan í júlí hefur engan árangur borið og hefur alþjóðleg handtökuskipun því verið gefin út.