Eins og fjölmiðlar hafa greint frá var tónlistarmaðurinn Bubbi Morthens lagður inn á Landspítalann um helgina eftir að slagæð fór í sundur í nefi. Bubbi þurfti að gangast undir aðgerð sem fólst í því að stöðva blæðinguna. Bubbi tjáir sig um atvikið í færslu á Facebook í dag þar sem hann hrósar starfsmönnum Landspítalans.
„Allt gekk vel þessa 4 daga sem ég dvaldi á Landspítalanum og sýndi mér enn og aftur hversu ótrúlega gott starfsfólk við höfum, fullt af kærleika og umhyggju þrátt fyrir fjársvelti og oft á tíðum ómanneskjulegt álag. Læknar og sérfræðingar í fremstu röð og tæknin er orðin ótrúleg,“ skrifaði Bubbi í færslu sem lesa má í heild hér að neðan.
Til stóð að Bubbi kæmi fram á tónleikum á laugardagskvöld í Hljómskálagarðinum með hljómsveitinni Dimmu en ekkert varð af því vegna veikinda Bubba.
Hann segir næstu daga einkennast af hvíld. „Ég þarf að hvíla mig næstu daga og síðan tekur hið venjubundna líf við. Ég er ótrúlega þakklátur öllum þeim sem hafa sent mér kveðjur og synir mér að nóg er til af ást og kærleika,“ skrifar Bubbi.