Lögreglan í Naverre, í norðausturhluta Spánar, stöðvaði síðasta laugardag bílstjóra í bænum Carcastillo. Í yfirlýsingu frá lögreglunni kemur fram að blóðprufa var tekin af ökumanninum og sagði lögreglan að bílstjórinn hafi verið „á öllum mögulegum eiturlyfjum sem til eru“.
Blóðprufan sýndi mikið magn af kannabis, amfetamíni, kókaíni, ópíum ásamt því að hann mældist með umtalsvert áfengismagn í blóðinu. Var bílstjórinn sektaður um 120.000 krónur vegna aksturs undir áhrifum áfengis og aðrar 120.000 krónur vegna aksturs undir áhrifum eiturlyfja.