Karlmaður var handtekinn nú rétt fyrir hádegi við gatnamót Grensásvegar og Miklubrautar. Hann var í mjög annarlegu ástandi og veittist að lögreglukonu við störf.

Að sögn mbl.is þurfti að flytja lögreglukonuna með sjúkrabíl á Landspítalann. Hún er sögð hafa verið alblóðug eftir árás mannsins.

Maðurinn ku hafa gengið á milli bíla á götunni en þegar lögregla reyndi að stöðva hann hafi maðurinn ráðist á lögreglukonuna. Ekki liggur fyrir hversu slösuð hún er.

Uppfært kl. 13:00

Lögregla hefur gefið út tilkynningu vegna málsins: „Nú skömmu fyrir hádegi var tilkynnt um mann í annarlegu ástandi á Grensásvegi. Er lögregla kom á vettvang brást maðurinn ókvæða við afskiptum lögreglu og veittist að þeim. Í  átökunum féllu lögreglumennirnir og maðurinn í götuna með þeim afleiðingum að annar lögreglumannanna skall harkalega með höfuðið í götunni og vankaðist við það. Hann var í framhaldi fluttur með sjúkrabifreið á Slysadeild til aðhlynningar og er þar ennþá til skoðunar. Maðurinn var handtekinn og færður í fangageymslur lögreglunnar.“