Valur Lýðsson hefur verið ákærður fyrir manndráp en honum er gefið að sök að hafa veist með ofbeldi að bróður sínum, Ragnari Lýðssyni, þann 31. mars síðastliðinn. Mbl.is greinir frá því að Valur hafi verið ákærður og vitnar í ákæru.

Þar kemur fram að Valur sé sakaður um að hafa slegið bróður sinn ítrekuðum hnefahöggum í höfuð og líkama. Auk þess er Valur sagður hafa sparkað ítrekað í höfuð og líkama bróður síns.

Ragnar er sagður hafa hlotið margvíslega áverka en það sem dró hann til dauða var banvæn innöndun magainnihalds. Hann hlaut alvarlega höggáverka ofarlega á enni sem olli blæðing innan höfuðkúpu. Höggáverkarnir urðu þess valdandi að Ragnar fann fyrir ógleði, svima og uppköstum, með fyrrnefndum afleiðingum.