Bandarískur karlmaður, Andre Pompey, hefur verið dæmdur til að greiða 35 ára konu rúmlega fimm milljónir Bandaríkjadala, rúman hálfan milljarð, í bætur eftir að hann birti stillur úr kynlífsmyndbandi þeirra á Facebook árið 2016.
Pompey þessi tók upp myndband af kynlífsathöfnum þeirra án vitundar konunnar. Síðar birti hann sem fyrr segir skjáskot úr myndbandinu á Facebook og taggaði fórnarlambið.
Pompey, sem er búsettur í Kaliforníu, var einnig dæmdur til að greiða 150 þúsund dali í sekt.
Áhrifin á fórnarlambið voru mikil, að því er segir í frétt USA Today, og glímdi konan meðal annars við sjálfsvígshugsanir eftir að myndirnar fóru á netið. „Hún titraði, skalf, var dofin og kastaði upp,“ segir Katrina Saleen, lögmaður konunnar.
Þá höfðu myndirnar mikil áhrif á aðstandendur konunnar, börn þar á meðal.
Dómari tók gjörðir Pompey engum vettlingatökum og dæmdi hann sem fyrr segir til að greiða fórnarlambinu sem nemur rúmum hálfum milljarði króna.