Ólafur Sigurðsson meindýraeyðir segir að útlit sé fyrir að geitungar og býflugur verði minna áberandi í sumar en mörg undanfarin sumur. Þetta á sérstaklega við um suðvesturhorn landsins þar sem rigning og tiltölulega lágar hitatölur hafa verið einkennandi.
Ólafur segir í Morgunblaðinu í dag að fólk muni eftir sem áður rekast á geitunga hér og þar, til dæmis þegar farið er í að sinna garðverkunum. Þeir verði og hafi ekki verið áberandi í sumar.
„Þetta er bara ónýt vertíð. Þegar náttúran er svona þá er fólk rólegt í tíðinni og sumarið rólegt hjá okkur. Við erum aðallega að sinna því sama og á veturna, eitrum fyrir silfurskottur og bjöllur heima hjá fólki og annað slíkt,“ segir Ólafur.
Þá er rætt við Guðmund Halldórsson skordýrafræðing sem segir að í tíðarfari líkt og verið hefur á suðvesturhorni landsins í sumar sé staðreyndin sú að býflugur og geitungar fjölga sér minna en þegar hlýtt er í veðri. Ekki séu miklar líkur á að geitungar og býflugur séu að drepast vegna veðurs.