Óhugnanlegt atvik átti sér stað í morgun þegar borgarstjóri tæplega 200 þúsund íbúa borgar var skotinn til bana.
Antonio Halili, borgarstjóri Tanauan á Filippseyjum, 173 þúsund íbúa borgar skammt suður af höfuðborginni Manila, var skotinn til bana fyrir utan vinnustað sinn í morgun. Halili var úrskurðaður látinn við komuna á sjúkrahús.
Árásarmaðurinn hefur ekki verið handtekinn en grunur leikur á að um hafi verið að ræða leyniskyttu. Samstarfsmenn Halili sögðust ekki hafa séð byssumanninn.
Halili þessi var ekki óumdeildur en hann var þekktur fyrir harða baráttu gegn grunuðum fíkniefnasölum. Átti hann það til að láta leiða þá í gegnum miðborgina svo íbúar gætu séð þá og virt þá fyrir sér. Orðrómur var hins vegar lengi á kreiki um að hann væri sjálfur viðriðinn viðskipti með fíkniefni en hann neitaði staðfastlega þeim sögusögnum.