Pia Kjærsgaard, forseti danska þingsins, segir gagnrýni íslenskra þingmanna, þá sérstaklega Pírata á þátttöku hennar á hátíðarfundi Alþingis á Þingvöllum í gær fáránlega. Þetta kemur fram í frétt á vef danska ríkisútvarpsins DR.
Pia sem hélt ræðu á hátíðarfundinum segir allt hafa gengið eins og í sögu þangað til hún opnaði fjölmiðla. „Mér fannst þetta frábær dagur, allt þar til ég las fjölmiðla í morgun,“ segir Pia í samtali við DR.
Eins og greint hefur verið frá þá sniðgengu Píratar hátíðarfundinn til að mótmæla þátttöku Piu. Þá mættu nokkrir þingmenn með barmmerki sem á stóð Nej, til racisme.
Þórhildur Sunna Ævarsdóttir, þingflokksformaður Pírata, sagði í samtali við fréttastofu RÚV í gær að Píratar geta ekki veitt Piu lögmæti með nærveru sinni. „Ég sé það sem svo að hið lýðræðislega tilraunaverkefni mannsins standi á tímamótum og hinum megin standi fasisminn,” segir Þórhildur við RÚV.
Pia gefur lítið fyrir þessi mótmæli Pírata og hvetur Pírata til að þroskast. „Ég held að þeir ættu að læra að þroskast. Mér sýnist Píratar vera að glíma við unglingavandamál,“ bætti hún við.