„Þetta er orðið mjög þreytandi. Við höfum ekki gert upp við okkur hvort við leggjum fram kæru en við ætlum að minnsta kosti að heyra í lögreglunni. Kannski eru fleiri tilvik um samskonar skemmdarverk í hverfinu,“ segir Birgir Valgarðsson, íbúi í Grafarholti í samtali við DV.
Birgir og fjölskylda hans hafa orðið fyrir endurteknu ónæði af hópi unglingsdrengja undanfarnar vikur. „Þetta byrjaði sem dyraat í smá tíma en síðan byrjuðu þeir að henda eplum í húsið. Ein slík árás átti sér stað í gær, á meðan úrslitaleikur HM var í gangi, og þá brutu þeir rúðu í útidyrahurðinni,“ segir Birgir.
Hann og eiginkona hans fóru strax út til þess að taka eftir skemmdarvargana en þá tók ekki betra við. Drengirnir grýttu þá hjónin með eplum og hlupu síðan á brott. „Það er eitt að grýta húsið en þetta er of langt gengið,“ segir Birgir. Hann segir að drengirnir hafi verið þrír talsins og á aldrinum 13-15 ára.
Hann skrifaði um atvikið á Facebook-síðu íbúa í Grafarholti og fékk mikil viðbrögð. Fleiri íbúar hafa lent í ónæði á undanförnum vikum og á dögunum var epli kastað í rúðu í nærliggjandi leikskóla með þeim afleiðingum að rúðan brotnaði.
Þá telja íbúar að drengirnir hafi brotið rúðu í leikskólanum á Maríuborg, og epli hafi þá einnig verið notað til verksins. Þá hafa þeir herjað á fleiri íbúðir og gert þar bjölluat. Þá segir einn óttasleginn íbúi:
„Þetta er einelti í hinni verstu mynd. […] Þið foreldrar sem eigið unglinga í hverfinu fylgist með börnum ykkar á kvöldin en börn hópast í kringum vatn stanganna í kringum Maríubaug gjörsamlega óþolandi læti og öskur í þessum börnum sem eru að reykja, drekka, dópa, kveikja elda, spreyja og krota allt hér. Hvernig geta krakkar komið heim til sýn á kvöldin angandi af reykinga og drykkju lykt án þess að foreldrar verði þess vör. Jú þá eru foreldrarnir í sama ástandi heima með sömu lykt á sér.“