Við Íslendingar búum við allt að því glæpsamlegt verð á áfengi þökk sé háum tollum og einokunarsölu ríkisins. Afleiðing af þessu er sú að neysluvenjur Íslendinga á áfengi eru aðrar en hjá flestum öðrum þjóðum. Íslendingar kaupa flestir áfengi sitt í áfengisbúðum ríkisins og drekka í heimahúsum áður en þeir halda út á lífið seint um nótt. Þá hafa margir freistast til þess að drekka ýmislegt ódýrt glundur sem er bruggað í heimahúsum.
Reddit-notandinn íslenski u/abitofg sá að þetta gæti ekki gengið svona lengur. Hann tók sig því til og reiknaði út verðið á millilítra af alkóhóli af öllum tegundum sem til er í ríkisversluninni. Þannig geta skattbarðir en þyrstir Íslendingar séð hvernig ódýrast er að drekka sig fulla. Kjararáðselskandi ríkisforstjórar geta svo farið á hinn enda listans og splæst í dýrasta droppann til þess ganga í augun á öðrum forstjórum.
Notendur samfélagsmiðilsins voru afar ánægðir með framtakið og hafði einn á orði: „Ekki allar hetjur klæðast skikkjum.“ Aðrir voru ekki sannfærðir og vildu meina að verið væri að sleppa mikilvægu staki í menginu, nefnilega bragðlaukunum. „Ég hef verið áhugamaður um að kaupa ódýra bjóra í gegnum tíðina til að verða drukkinn, en stundum getur maður ekki boðið bragðlaukunum eða líkamanum upp á þetta sull,“ segir einn reynslubolti. En hvað um það, þetta eru mikilvægar upplýsingar sem þjóðin þarf á að halda.