Í gær fjallaði DV um mynd sem Ingólfur Páll Matthíasson, umhverfissinni og leiðsögumaður, deildi á Facebook. Á myndinni sem tekin var við verslun Krónunnar mátti sjá ruslagám fullan af mat sem virtist í góðu lagi. Umfjöllunin vakti töluverða athygli en Ingólfur sagði að með þessu væri verslunin meðal annars að móðga fátækt fólk.
Sjá einnig: Ingólfur opnaði ruslagám við Krónuna og blöskraði:„Móðgun við fátækt fólk“
Forsvarsmenn Krónunnar hafa nú svarað fyrir atvikið en í færslu á Facebook-síðu Krónunnar er atvikið harmað. „Við erum þakklát fyrir allar þær ábendingar sem við fáum og viljum koma því á framfæri að það skiptir okkur í Krónunni mjög miklu máli að lágmarka alla matarsóun og erum við stöðugt að leita leiða til að bæta okkur enn frekar,“ segir í færslunni.
Í yfirlýsingunni sem sjá má í heild hér að neðan segja forsvarsmenn Krónunnar að fyrirtækið hafi á undanförnum árum unnið markvisst að því að minnka matarsóun. „Krónan hefur markvisst verið að bæta verkferla til að stuðla að minni matarsóun og sem dæmi þá seldust yfir 50 tonn af matvælum á síðasta ári í gegnum „minnkum matarsóun“ verkefnið okkar. Ljóst er að þarna var ekki farið eftir verkferlum og við hörmum það.“
Við erum þakklát fyrir allar þær ábendingar sem við fáum og viljum koma því á framfæri að það skiptir okkur í Krónunni mjög miklu máli að lágmarka alla matarsóun og erum við stöðugt að leita leiða til að bæta okkur enn frekar.
Krónan hefur markvisst verið að bæta verkferla til að stuðla að minni matarsóun og sem dæmi þá seldust yfir 50 tonn af matvælum á síðasta ári í gegnum „minnkum matarsóun“ verkefnið okkar.
Við leggjum mikla áherslu á að flokka þær vörur sem komnar eru á síðasta söludag eða eru útlitsgallaðar en betur má ef duga skal og ljóst er að þarna var ekki farið eftir verkferlum og við hörmum það.