Slökkvilið höfuðborgarsvæðisins var kallað út á sjötta tímanum í morgun vegna elds sem kviknaði á gistiheimili í Reykjavík.

Í samtali við DV segir varðstjóri slökkviliðsins að kviknað hafi í dýnu hjá tveimur ferðamönnum. Upptök eldsins voru af völdum hleðslutækis sem tengt var við farsíma, en síminn hafði legið á dýnunni yfir nóttina. Snemma um morguninn vaknaði annar gesturinn við skrýtna lykt og blossaði upp eldur þegar hann reif sængina af sér.

Ferðamennirnir voru búnir að bera vatn á eldinn þegar slökkviliðið mætti á vettvang og gekk vel í kjölfarið að reykhreinsa svæðið.

„Ég vil ýta undir hversu hættulegt það er að vera með hleðslusnúrur tengdar,“ segir varðstjórinn. „Þær geta kveikt í og eru í raun allar stórhættulegar.“

Ekki var gefið upp um hvaða gistiheimili er að ræða.