Brynjar Níelsson, þingmaður Sjálfstæðisflokksins, segir Vilhjálm H. Vilhjálmsson lögmann hafa kolrangt fyrir sér hvað varðan skipan dómara í Landsrétt. Vilhjálmur segir í aðsendri grein í Fréttablaðinu að Sigríður Andersen dómsmálaráðherra hafi skipað eiginkonu Brynjar sem dómara vegna pólitískra hrossakaupa.
„Stundum ber kappið fegurðina ofurliði þegar sparka þarf í pólitíska andstæðinga. Slíkt henti gamlan kollega, Vilhjálm H. Vilhjálmsson, eða Villa Vill, eins og hann er gjarnan nefndur, í aðsendri grein í Fréttablaðinu í morgun um skipan í Landsrétt. Þar segir Villi Vill orðrétt: „Meðal annars skipaði dómsmálaráðherra eiginkonu flokksbróður síns, sem hafði áður látið henni eftir efsta sæti á framboðslista Sjálfstæðisflokksins í Reykjavík, svo hún gæti örugglega orðið ráðherra“,“ skrifar Brynjar á Facebook.
Brynjar rekur aðdraganda málsins sem hann telur sýna að fullyrðing Vilhjálms eigi sér ekki stoðið í raunveruleikanum. „Villi Vill á oft góða spretti en þarna kom hann lafmóður í mark með buxurnar á hælunum. Eins og allir vita voru kosningar síðla árs 2016. Ríkisstjórnin mynduð í janúar 2017 og umræddur dómsmálaráðherra hafði verið í þriðja sæti listans í Reykjavíkurkjördæmi suðurs, næst á eftir þessum flokksbróður sem kemur við sögu í grein Villa Vill. Dómarar í Landsrétti voru skipaðir um sumarið 2017. Það er því augljóslega rangt að þessi flokksbróðir hafi gefið eftir sæti sitt svo hún gæti orðið ráðherra, væntanlega í því skyni að hún skipaði eiginkonuna í embætti Landsréttardómara,“ segir Brynjar.
Brynjar segir að þetta hafi ekki verið djúphugsuð spilling. „Til að rifja aðeins upp fyrir Villa Vill þá sprakk ríkisstjórnin síðsumars 2017 og kosið var aftur um haustið. Þá lagði þessi flokksbróðir fram þá tillögu við uppstillingarnefnd að umræddur ráðherra skipaði efsta sæti listans. Sú tillaga hafði ekkert með eiginkonuna að gera enda hún þegar skipuð í starfið. Hún var einkum tilkomin af femínískum áhuga flokksbróðursins en flokkurinn hafði verið gagnrýndur fyrir að engin kona væri oddviti. Flokksbróðirinn vildi sýna að flokkurinn treysti mjög vel konum til að leiða lista. Ef einhver skyldi halda að þetta væri djúphugsuð spilling þá er skyggnigáfa ráðherrans og flokksbróðursins ekki svo mikil að þau sáu fyrir kosningar um haustið og þá yrði uppstilling en ekki prófkjör,“ segir Brynjar. Pistil Vilhjálms má lesa í heild sinni hér.
