Birkir Már Sævarsson, landsliðsmaður í fótbolta er ný kominn heim frá Rússlandi þar sem hann lék alla leiki Íslands á HM. Birkir sem leikur með Val í Pepsí-deildinni hefur ákveðið að skrá sig í tölvunarfræði í Háskóla Íslands í haust. Það er Rúv sem greinir frá þessu. 

Birkir spilaði vel á mótinu og tókst meðal annars að halda einum besta fótboltamanni heims, Lionel Messi í skefjum. Það vakti svo töluverða athygli á mótinu þegar fjölmiðlar um allan heim greindu frá því að Birkir starfaði hjá saltverksmiðjunni Saltverki. Hann hefur nú ákveðið að söðla um.

„Ég hef gaman af því að vesenast í tölvum og öðru svona tækniveseni. Það var búið að loka fyrir umsóknir í nám í flugumferðarstjórn þannig að ég ákvað bara að henda mér í tölvunarfræði allavega þangað til ég get sótt um flugumferðarstjórann,“ sagði Birkir í samtali við Rúv.