Um kl. 19:00 í gærkvöldi bárust lögreglunni á Norðurlandi eystra upplýsingar um að sést hefði til hvítabjarnar nyrst á Melrakkasléttu eða suður af Hraunhafnarvatni. Um svipað leyti kom Áslaug Arna Sigurbjörnsdóttir, varaformaður þingflokks Sjálfstæðisflokksins, til Öxarfjarðar þar sem hún er stödd í hestaferð.
Öxarfjörður er skammt frá þeim stað sem talið er að ísbjörninn hafi sést. Áslaug greindi frá þessu á Twitter-síðu sinni í gærkvöldi. „Fyrsta smsið sem ég fæ er að tilkynna um hvort ég sjái ÍSBJÖRN,“ skrifaði Áslaug meðal annars í færslunni sem sjá má hér að neðan.
Ég var að lenda á upphafsstað hestaferðar sem hefst á morgun og agalega kát með verið. Fyrsta smsið sem ég fæ er að tilkynna um hvort ég sjái ÍSBJÖRN! ? pic.twitter.com/PE7rJhln1B
— Áslaug Arna (@aslaugarna) July 9, 2018
Samkvæmt tilkynningunni sem lögreglan sendi frá sér í gær er ekki búið að staðfesta að um hvítabjörn sé að ræða en lögreglan á svæðinu skimaði eftir birninum til hálf eitt í nótt.
Áslaug er við öllu búin en seint í gærkvöldi birti hún mynd af byssu á Instagram síðu sinni. „Ef allt fer á versta veg,“ skrifaði Áslaug við myndina.