Í forsíðuviðtal Mannlífs, sem kom út í morgun, stígur Kiana Sif Limehouse fram og segir frá meintum kynferðisbrotum fyrrverandi stjúpföður síns. Maðurinn starfaði sem lögreglumaður á þeim tíma og gegnir því starfi enn. Kiana er önnur stúlkan af þremur sem stígur fram og segir frá meintum kynferðisbrotum mannsins en allar þrjár stúlkurnar lögðu fram kærur gegn manninum. Fyrir viku birti Mannlíf viðtal við móður Helgu Elínar sem einnig sakaði sama mann um að hafa brotið á dóttur sinni í sumarbústaðaferð þegar hún var 10 ára gömul. Kiana Sif og Helga Elín voru vinkonur sem börn og bauð Kiana vinkonu sinni með sér í fyrrnefnda sumarbústaðaferð. Þar á stjúpfaðir Kiönu að hafa brotið kynferðislega á Helgu Elínu.
Í viðtalinu kom fram að vinur stjúpföður Kiönu hafi verið með í för ásamt eiginkonu sinni. Sá er háttsettur starfsmaður hins opinbera. Gestkomandi parið á að hafa haft einhverskonar klámefni með í för og þá er því haldið fram að hin fullorðnu hafi drukkið stíft í ferðinni. Síðar um kvöldið á stjúpfaðir Kiönu að hafa brotið kynferðislega á vinkonu dóttur sinnar, Helgu Elínu. Þegar málið var rannsakað voru gestkomandi hjónin yfirheyrð í nokkrar mínútur á embættisskrifstofu mannsins. Þau hjónin báru fyrir sig minnisleysis vegna áfengisdrykkju. Síðar var kæra Helgu Elínar felld niður og byggði niðurfelling málsins meðal annars á vitnisburði óminnishegranna.
Í kjölfarið flosnaði upp úr vinskap Kiönu og Helgu Elínar og glímdu þær báðar við margskonar erfiðleika í kjölfar hina meintu brota. Erfiðleika sem þær eru enn þann dag að fást við.