Klukkan 01.53 í nótt gáfu lögreglumenn ökumanni, sem ók eftir Miklubraut, merki um að stöðva aksturinn. Hann sinnti því ekki og hóf lögreglan þá eftirför. Hún barst um Ártúnsbrekku, Vesturlandsveg að verslun Bauhaus þar sem ökumaðurinn sneri við. Hann ók aftur um Ártúnsbrekku og Miklubraut og umhverfis Kringluna að Háaleitisbraut og síðan aftur austur Vesturlandsveg. Þaðan barst eftirförin inn í Mosfellsbæ, Þingvallaveg og í Kjós þar sem akstur ökumanns var stöðvaður við Meðalfellsveg.
Ökumaðurinn er grunaður um að hafa ekið á allt að 190 km/klst auk þess sem hann er grunaður um að hafa verið undir áhrifum fíkniefna. Hann verður einnig kærður fyrir ýmis önnur brot, til dæmis að fara ekki að fyrirmælum lögreglu og akstur á móti umferð. Hann var vistaður í fangageymslu.