Reiði hefur blossað upp á samfélagsmiðlum eftir að fréttaljósmyndari náði býsna magnaðri mynd af konu sem lá slösuð á járnbrautarteinum í ítölsku borginni Piacenza á dögunum.
Konan sem um ræðir, kanadískur ferðamaður, varð fyrir lest og á meðan sjúkraflutningamenn hlúðu að konunni sá óþekktur karlmaður, mögulega ferðamaður, ástæðu til að taka af sér sjálfsmynd með konuna í bakgrunni.
Ljósmyndarinn, Giorgio Lambri, náði aftur á móti mynd af ferðamanninum og hafa allir helstu fréttamiðlar Ítalíu – og víðar, BBC til dæmis – birt myndina.
Eðli málsins samkvæmt hefur myndin vakið talsverða umræðu um velsæmi, sómatilfinningu og náungakærleik sem sumir virðast eiga erfitt með að sýna. Velta sumir því fyrir sér hvernig fólk hefur það í sér að taka mynd í aðstæðum sem þessum.
Að því er BBC greinir frá hafði lögregla hendur í hári mannsins sem tók sjálfsmyndina og bað hann vinsamlegast um að eyða myndinni. Maðurinn er sagður hafa gert það en engin lög virðast ná yfir gjörning sem þennan og því var maðurinn ekki kærður.
Konan sem um ræðir slasaðist alvarlega, sem fyrr segir, og þurftu læknar að fjarlægja annan fótlegg hennar.
Myndina sem um ræðir má sjá hér að neðan: