Það er engum ofsögum sagt að 55 ára kona, Olga Kuldo, geti þakkað fyrir að vera á lífi eftir að hafa lent í ótrúlegum ógöngum við grísku eyjuna Krít í Miðjarðarhafinu.
Olga, sem er frá Zelenograd í Rússlandi, var stödd í sumarleyfi á Krít þegar hún ákvað að skella sér í sjóinn á vindsæng. Hún virðist hafa legið þar í dágóða stund því þegar hún rankaði við sér var hún komin langt frá landi. Hún reyndi hvað hún gat að koma sér aftur að landi en án árangurs, meðal annars vegna öflugra hafstrauma á þessu svæði.
Tæpum sólarhring síðar, 21 klukkutíma nánar tiltekið, fannst Olga á vindsænginni en þá var hún komin rúma ellefu kílómetra frá landi. Það var flugvél, sem hefur eftirlit með ólöglegum fólksflutningum á Miðjarðarhafi, sem kom auga á Olgu. Eðli málsins samkvæmt var hún orðin nokkuð þrekuð og sólbrunnin, eftir allan þennan tíma í sólinni.
Olga var á ferð með eiginmanni sínum, Oleg, og dóttur, Yuliu, á Rethymno. Þau létu yfirvöld vita þegar Olga skilaði sér ekki heim á hótelið. Hún var flutt á sjúkrahús vegna ofþornunar og brunasára en mun þó vera á batavegi sem betur fer.