„Foreldrar mínir áttu í slitróttu og erfiðu sambandi. Pabbi minn glímir við mikinn hegðunarvanda. Þá og nú. Hann kom illa fram,“ segir Sanna Magdalena Mörtudóttir, nýkjörinn borgarfulltrúi Sósíalistaflokksins.
Sanna er í viðtali í helgarblaði Fréttablaðsins þar sem þessi 26 ára baráttukona lýsir meðal annars uppvaxtarárum sínum. Sanna er 26 ára, fædd árið 1992 í Reykjavík en flutti ung að árum til London.
Faðir Sönnu er frá Tansaníu en foreldrar hennar kynntust í Englandi þar sem móðir hennar stundaði nám í förðun. Sanna var aðeins nokkurra vikna gömul þegar móðir hennar flaug með hana til London. Eins og Sanna segir frá í Fréttablaðinu varði samband foreldra hennar stutt en þær mæðgur bjuggu áfram í Englandi. Var Sanna sjö ára þegar hún flutti aftur til Íslands.
„Mamma reyndi sitt besta og reyndi að ýta undir samskipti á milli okkar. En það gekk ekki vel. Hann hvarf oft í langan tíma. Ég fékk seinna að heyra að á þessum tíma hefði hann verið í fíkniefnaneyslu,“ segir Sanna um föður sinn.
„Á tímabili dvöldum við í athvarfi í London. Það var reyndar stuttur tími en lýsir því kannski að lífið var ekki alltaf auðvelt. Mamma þurfti til dæmis einu sinni að kalla til lögreglu til að ná mér út af heimili hans. Þá vildi hann ekki skila mér aftur til hennar,“ segir Sanna og bætir við að faðir hennar hafi ekki staðið sig í föðurhlutverkinu. Hann hafi verið yfirlýsingaglaður um ást sína á henni, deilt myndum af henni á Facebook á sama tíma og hann var ekki í neinum samskiptum við hana. Það hafi reynst vel að loka á samskipti við hann. Hún tekur þó fram að föðurfjölskylda hennar hafi reynst henni vel.
Sanna segir að þetta sé hluti af sögu þeirra mæðgna. „Við mamma erum svolítið einar á báti. Við erum tvær í teymi.“