Um mánaðamótin missir Margrét De Leon Magnúsdóttir meðlagsgreiðslur og heimilisuppbót, tekjur hennar eftir skatt fara því úr 223 þúsund krónum í rúmar 120 þúsund krónur. Margrét lenti í bílslysi fyrir nokkrum árum og er 75% öryrki. Hún býr í Fellahverfinu með tveimur börnum sínum, 18 og 20 ára. Hún þarf að vera búin að fara í endurmat á örorku fyrir ágústmánuð og því er alls óvíst að hún verði með einhverjar tekjur í haust. Húsaleigan er 190 þúsund krónur á mánuði og sér hún fram á mjög erfiða tíma. Í blaðinu í dag eru birtar tekjur 2.400 einstaklinga, Margrét er ekki þeirra á meðal en hún birtir reglulega upplýsingar um sínar tekjur á samfélagsmiðlum til að vekja athygli á stöðu sinni og annarra öryrkja.
„Það verður einhver að stíga fram, ég á fjölda ættingja sem munu örugglega tauta hvað ég sé að fara með þetta í blöðin en mér er alveg sama. Þetta er ekki mál sem á að fela,“ segir Margrét í samtali við DV. Hún segir að hún hafi reynt að fá sér vinnu en að sögn lækna þoli líkami hennar það ekki. „Það koma dagar þar sem ég er hress, en það endist iðulega ekki lengi.“
„Ég er búinn að taka allt saman á Excel, það sem ég fæ frá lífeyrissjóðnum, lífeyri og bætur. Þegar ég er búin að draga frá 190 þúsund í leigu, 35 þúsund krónur upp í skuld við TR og nettenginguna, því ég vil vera tengd umheiminum, þá er ég með rúmar 16 þúsund krónur eftir fyrir mat. Ef ég þarf að fara til læknis þá er ódýrara fyrir mig að drepast,“ segir Margrét. Þegar bæturnar hennar lækka nú um mánaðamótin þá sér hún ekki fram á að geta framfleytt sér. „Ég segi bara eins og pabbi minn sálugi sagði alltaf, farið með mig út í hraun, finnið gjótu, skjótið mig í hnakkann og hendið mér ofan í. Þá þarf ekki að borga jarðarför.“
Þrátt fyrir allt þetta segist Margrét vera heppin. „Ég tel mig heppna, ég er að leigja hjá Almenna leigufélaginu og er svo heppin að leigan mín hefur ekki hækkað síðan ég fór að leigja hjá þeim árið 2015. Þetta er 100 fermetra íbúð og að sögn þeirra er ég það góður leigjandi að þeir töldu ekki þörf á að hækka leiguna. Að minnsta kosti ekki í bili. Ég veit ekki hvað ég geri núna, ég get ekki hent börnunum mínum út.“