Björgunarsveitir á Ísafirði og Hnífsdal voru kallaðar út á öðrum tímanum í dag vegna fólks í sjálfheldu ofarlega í Eyrarfjalli ofan við Ísafjörð.
Samkvæmt Halldóri Óla Hjálmarssyni hjá Björgunarfélagi Ísafjarðar var um að ræða karlmann á fertugsaldri með tvær stúlkur á aldrinum sjö og tíu ára. Segir Halldór að tólf björgunarsveitarmenn héldu í útkallið rúmum hálftíma eftir að beiðni um aðstoð barst.
Maðurinn og börnin höfðu setið föst við Eyrarfjall og treystu þau sér hvorki áfram upp né niður fjallið. Voru þau orðin skelkuð að sögn Halldórs og óskuðu eftir aðstoð þar sem jarðvegurinn við fjallið er laus og hlíðarnar brattar.
Maðurinn og börnin eru óslösuð og heilsast þeim vel en var þeim orðið afar kalt eftir atvikið.