Sigmundur Davíð Gunnlaugsson, formaður Miðflokksins og fyrrverandi forsætisráðherra, deilir á Facebook-síðu sinni tölfræði varðandi leik Íslands gegn Nígeríu á morgun. Tölfræði Sigmundar birtist fljótt innan Facebook-hópsins Algjörlega óáhugaverðar fótboltaupplýsingar, þar sem meðlimir deila upplýsingum til dæmis hæð leikmanna og þá vegalengd sem lönd þurfa að ferðast til að komast á HM í Rússlandi.
Sigmundur Davíð bendir hins vegar á að leikurinn á morgun sé merkilegur fyrir þær sakir að hve mikil hlutfallslegur munur sé á íbúafjölda liðanna tveggja. „Vegna HM er mikið rætt um það í erlendum fjölmiðlum hversu fáir Íslendingar séu, eðlilega. Mér sýnist að á morgun verði hlutfallslegur munur á íbúafjölda sá langmesti í sögu HM. Hin öfluga fótboltaþjóð Nígería næst-fjölmennasta þjóðin á HM (og fer fram úr Brasilíu eftir u.þ.b. 3 ár),“ skrifar fyrrverandi forsætisráðherra.
Sigmundur segir að Nígeríumönnum muni fjölga um meira en nemur allri íslensku þjóðinni, einungis á meðan HM stendur yfir. „Nígeríumönnum fjölgar um 5 milljónir á ári sem þýðir að á morgun mætum við þjóð sem hefur fjölgað um tífaldan íbúafjölda Íslands frá því við komumst á HM. Þeim mun fjölga talsvert meira en nemur öllum Íslendingum bara á meðan á úrslitakeppninni stendur. Maður er enn að átta sig á þeirri staðreynd að Ísland sé á heimsmælikvarða í fótbolta …og ekki bara miðað við höfðatölu. Ótrúlegt afrek og vonandi gengur vel gegn stórþjóðinni á morgun,“ segir Sigmundur.