Vigdís Hauksdóttir og Kolbrún Baldursdóttir, borgarfulltrúar Miðflokksins og Flokks fólksins, saka Líf Magneudóttur, oddvita Vinstri grænna, um einelti og subbuskap í garð Sönnu Magdalenu Mörtudóttur, oddvita Sósíalistaflokks Íslands, á borgarstjórnarfundi á þriðjudaginn.
Vigdís segir á Fésbókarsíðu sinni að hún sé mjög hugsi eftir fundinn á þriðjudaginn:
„Ég er orðlaus yfir þeim ávirðingum og árásum sem nýkjörinn borgarfulltrúi Sósíalista, Sanna Magdalena fær yfir sig úr öllum áttum – ég bara næ þessu ekki,“ segir Vigdís. Sakar hún Dag B. Eggertsson borgarstjóra og Líf að hæða og spotta Sönnu: „Það er bæði ljótt og subbulegt að fólk sem hefur reynslu á þessum vettvangi ráðist að nýkjörnum borgarfulltrúa á hennar fyrsta fundi – en þau afhjúpuðu sig algjörlega og sýndu sinn innri mann sem eftir verður munað.“
Kolbrún Baldursdóttir tók í sama streng og Vigdís, en þó með eilítið varfærnislegra orðalagi en Vigdís. Segir Kolbrún, sem er sálfræðingur, að þörf sé á viðbragðsáætlun gegn einelti í borgarstjórn:
„Ég hef áralanga reynslu af því að vinna með samskipta- og eineltismál og hef skrifað fjölmargar greinar um einelti á vinnustað. Ég myndi gjarnan vilja heyra í öðrum borgarfulltrúum, fráfarandi og núverandi um hvort þeir telji að einelti hafi tíðkast á þessum vinnustað.“
Líf spurði á fundinum hvort Sósíalistar væru hægri flokkur þar sem Eyþór Arnalds, oddviti Sjálfstæðisflokksins, hafi talað um „hægri minnihluta“, en hafnaði því á Twitter að hafa gefið í skyn að Sósíalistar væru hægri flokkur: „Kona spyr sig bara og spurði bara einfaldra spurninga. Óþarfi að fara í fýlu,“ sagði Líf á Twitter. Bætti hún svo við að það þurfi að „varast pyttina sem Sjálfstæðisflokkurinn býr til og halda sig við málefnin.“
Og ég átta mig fyllilega á því að sérstaða hvers flokks helst þrátt fyrir samstarf við ólíka flokka – ég vildi bara vita hvað borgarfulltrúum annarra en D þætti um þessi orð @eythorarnalds …. en haldið bara áfram útúrsnúningum. VEISLA!
— Líf Magneudóttir (@lifmagn) June 19, 2018
Fundur borgarstjórnar á þriðjudaginn var rúmlega 9 klukkustunda langur, mikið var rætt um meintan gagnaleka þar sem Líf vissi hverjir yrðu í nefndum minnihlutans fyrir fundinn. Einnig ítrekaði Eyþór að minnihlutinn væri með fleiri atkvæði á bak við sig en meirihlutinn og vildi því að Sjálfstæðisflokkur, Miðflokkur, Flokkur fólksins og Sósíalistaflokkurinn yrðu kallaðir stjórnarandstaða frekar en minnihluti. Það virtist ganga erfiðlega og voru flokkarnir ítrekað kallaðir minnihluti af fulltrúum meirihlutans.
DV tók saman myndband af orðaskiptum Lífar, Sönnu, Vigdísar og Kolbrúnar þegar rúmir þrír tímar voru búnir af fundinum.
Allan fundinn má svo sjá hér fyrir neðan.