Forseti lýðveldisins, Guðni Th. Jóhannesson, hefur hlotið skammir innan Facebook-hópsins Verst lagði bílinn en þar var birt mynd af bíl forsetans lögðum ólöglega á gangstétt. Sá sem deildi myndinni skrifaði einfaldlega: „#ekkiminnforseti“.
Nokkrir í hópnum segja þetta lélega framkomu af forsetanum en þeir beina skömmum sínum af röngum forseta, því Guðni er alsaklaus að þessari framkomu. Sá sem skrifar innleggið upplýsir í þræðinum stuttu síðar að myndin hafi verið tekin í tíð Ólafs Ragnars Grímssonar. „Já þetta er gömul mynd. Þarna var Óli grís að ná sér í eina með extra ananas. Nei ég meinti bílstjórinn hans,“ segir maðurinn.
Ein kona segir farir sínar ekki sléttar af bílstjóra Ólafs Ragnars: „Ég veit ekki hvort Guðni sé með sömu bílstjóra en ÓRG var með ævintýralega lélega og tillitslausa bílstjóra í sinni tíð. Þegar ég bjó útá nesi reyndi maður helst að keyra út í kant og stoppa ef maður mætti þeim, því þeir keyrðu veeeeel yfir hámarkshraða og eignuðu sér veginn. En ég hef séð annaðhvort þessa mynd eða mjög svipaða frá því að hann var forseti.“
Örnólfur Thorsson forsetaritari staðfestir í samtali við DV að myndin sé gömul. „Þetta er allgömul mynd, kannski fimm til sex ára gömul,“ segir Örnólfur.
