Bergvin Oddsson, fyrrverandi formaður Blindrafélagsins, segir farir sínar ekki sléttar af sumarbúðum KFUM og KFUK. Hann segir að barn sitt hafi komið heim úr dvöl í sumarbúðunum í sömu fötum og það fór, um viku áður. Bergvin segir enn fremur að öll fötin sem barnið hafi tekið með hafi verið ósnert í töskunni.

„Nú er ég alveg hlessa…. langar að fá ykkar skoðun á þessu máli… Hvað finnst ykkur um það þegar 7-11 ára gömul börn eru í sumarbúðum í 5-7 daga og koma heim í sömu fötunum til baka, öll fötin í töskunni ósnert og ekkert búinn að fara í bað.. Er starfsfólk KFUM&K starfi sínu vaxið??? Er hægt að ætlast til þess að börnin sjálf sjái um þetta??? hvað finnst ykkur gott fólk,“ skrifar Bergvin á Facebook-síðu sína.

Nokkrir skrifa athugasemd og segjast einungis eiga góðar minningar úr sumarbúðunum. Því svarar Bergvin: „Auðvitað skiptir máli að eiga góðar minningar úr sumarbúðunum, búa til nýja vináttu og njóta augnabliksins, en er ekki allt í lagi að staffið í Vatnaskógi sem og í öðrum sumarbúðum spái í þrifnaði barnanna.Eru tennur burstaðar í sumarbúðunum, hvað ef börnin missa þvag eða það koma bremsuför… Flest af þessum börnum eru að sofa í fyrsta skiptið ein eða þá án náinna fjölskyldumeðlima… Legg til að við leysum þetta vandamál og á miðvikudögum og sunnudögum sé baðdagur í Vatnaskógi.“

Tómas Torfason, framkvæmdastjóri KFUM og KFUK, svarar svo Bergvini í athugasemd. Hann segir að enginn sé þvingaður í sturtu þó börn séu eindregið hvött til þess. „ Í hverjum dvalarflokki í Vatnaskógi (og öðrum sumarbúðum KFUM og KFUK) eru börnunum bent á að fara í sturtu a.m.k. 2.-3. sinnum. Samhliða er þeim bent á að fara í hrein föt. Vinnureglan er að hvetja þau til þess, benda þeim á og jafnvel segja þeim beint að fara í sturtu, en við neyðum þau aldrei til þess. Auðvitað getur orðið misbrestur á eftirfylgninni hjá okkar fólki og erum við því þakklát fyrir allar ábendingar um það sem betur má fara.
KFUM og KFUK starfrækja 5 sumarbúðir. Tæplega 2.600 börn og unglingar taka þátt í sumarbúðastarfi félagsins á hverju sumri. Umhirða og þrifnaður barnanna er mikilvægur liður á þeim námskeiðum sem við höldum með starfsfólki okkar.“