Reikna má með því að atvinnulíf hér á landi muni hreinlega lamast á meðan á leik Íslands og Nígeríu á heimsmeistaramótinu í knattspyrnu stendur. Leikurinn hefst klukkan 15:00 á föstudag og nú þegar eru fyrirtæki byrjuð að auglýsa lokanir.
Landsbankinn og Íslandsbanki hafa sent frá sér tilkynningu þar sem fram kemur að bankarnir muni loka fyrr á föstudag svo starfsfólk missi ekki af neinu. Landsbankinn mun loka klukkan 14:00 og Íslandsbanki klukkan 15:00.
Þá munu skrifstofur og þjónustuver VR loka kl. 14.30 á föstudaginn. Á þetta við um skrifstofur VR á öllum félagssvæðum, þ.e. í Reykjavík, á Akranesi, Egilsstöðum, Suðurlandi og í Vestmannaeyjum. Í tilkynningu frá VR skorar félagið á önnur fyrirtæki að gera slíkt hið sama.
