Á nýafstöðnum Bíladögum á Akureyri var eitt kynferðisbrot kært til lögreglu. Einn maður var handtekinn í Reykjavík vegna málsins en honum sleppt að lokinni yfirheyrslu. Lögreglan á Norðurlandi eystra greinir frá þessu á Facebook-síðu sinni.

Auk meinta kynferðisbrotsins var ein líkamsárás tilkynnt til lögreglu. Tveir hafa verið verið yfirheyrðir vegna hennar. Lögregla segir þó að umferðamál hafi verið fyrirferðamest á Bíladögum.

„Verkefni lögreglunnar voru fjölbreytt þessa daga en voru umferðamálin þó sínu fyrirferðar mest. 78 ökumenn voru stöðvaðir fyrir of hraðan akstur og ók sá sem hraðast ók á 135 km/klst. Þá voru 20 ökumenn sektaðir fyrir að vera með litaðar filmur í fremri hliðar rúðum og nokkrir voru ekki með ökuskírteinin sín meðferðis. Alls urðu 10 umferðaróhöpp í umdæminu en aðeins var um slys að ræða í einu þeirra,“ segir í tilkynningu.

Nokkur minniháttar fíkniefnabrot áttu sér stað á Bíladögum. „Enginn var tekinn fyrir grun um ölvunarakstur en 3 fyrir akstur undir áhrifum fíkniefna og verðum við að segja að við erum ánægð með að þau brot hafi ekki verið fleiri. Afskipti voru höfð af 4 einstaklingum vegna fíkniefnabrota og voru þau öll minniháttar.“