Íslenska þjóðin er hóflega bjartsýn á gengi íslenska knattspyrnulandsliðsins á HM í Rússlandi samkvæmt nýrri könnun MMR. Af aðspurðum telja 59% íslenska landsliðið líklegt til að komast upp úr riðlakeppninni en þar af telja tæp 19% að liðið kæmist í 8 liða úrslit eða lengra. 41% svarenda spá hins vegar að þátttöku Íslands í keppninni myndi ljúka með síðasta leik liðsins í hinum geysisterka D-riðli. Aðeins 2% telja að Ísland verði heimsmeistari í knattspyrnu karla.
Konur voru líklegri til að telja að liðið kæmist upp úr D-riðli heldur en karlar, 67% á móti 52%. Fólk á aldrinum 18-29 ára og 68 ára og eldri voru líklegastir til að spá Íslandi áfram í 16 liða úrslit eða lengra, 66% og 69%.
Athygli vekur að bjartsýni á gengi íslenska liðsins fór minnkandi með aukinni menntun og heimilistekjum. Telja rúm 54% þeirra sem eru með milljón krónur eða meira í mánaðarlaun að Ísland komist ekki upp úr riðlinum á móti 29% þeirra sem eru með undir 400 þúsund krónum í mánaðarlaun.
39% fólks sem hefur klárað grunnskóla telur að Ísland komist ekki upp úr riðlinum, á móti 54% þeirra sem eru með háskólapróf.
Könnunin var gerð dagana 12. til 18. júní. Alls svöruðu 925 einstaklingar, 18 ára og eldri, valdir af handahófi úr hópi álitsgjafa MMR.