„Einn hættulegasti hryðjuverkamaðurinn sem hefur verið handtekinn á Spáni.“ Svona hljóðaði tilkynning frá spænska innanríkisráðuneytinu fyrir ári síðan þegar Ahmed Samsam hafði verið handtekinn í Estepona. Samsam er 28 ára danskur ríkisborgari sem barðist í Sýrlandi með hryðjuverkasamtökunum sem kenna sig við Íslamska ríkið (IS).

Nú standa réttarhöld yfir á Spáni þar sem Samsam situr á ákærubekknum en hann er ákærður fyrir að barist fyrir IS frá 2012 til 2015. Hann er einnig ákærður fyrir að hafa reynt að útvega IS vopn á Spáni en þessi vopn telur ákæruvaldið að hafi átt að nota til hryðjuverka. Hann er einnig ákærður fyrir að hafa fjármagnað hryðjuverkastarfsemi með að senda peninga til annarra liðsmanna IS.

Í samtali við Danska ríkisútvarpið (DR) sagði Samsam að hann sé hissa á þessum ákærum. Hann fer ekki leynt með að hann hafi verið í Sýrlandi og hafi verið undir eftirliti dönsku leyniþjónustunnar vegna þess. Hann vísaði því alveg á bug að hann væri hryðjuverkamaður en viðurkenndi að hafa barist gegn stjórn Bashar al-Assad en ekki með IS heldur öðrum samtökum sem væru ekki eins öfgasinnuð.

Samsam ólst upp í Óðinsvéum og Kaupmannahöfn hjá foreldrum sínum, sem eru frá Sýrlandi, og sex systkinum. Hann komst ungur að árum í kast við lögin og hefur hlotið fjölmarga dóma fyrir rán, ofbeldisbrot, brot á vopnalögum og fíkniefnabrot auk umferðarlagabrota. Þá var hann tengdur glæpagengjum.

Yngri bróðir hans var stunginn til bana á Norðurbrú í Kaupmannahöfn 2015. Enginn hefur verið handtekinn vegna morðsins en það tengist átökum glæpagengja. Bróðirinn hafði einnig barist í Sýrlandi.