Í mars síðastliðnum var eigandi skartgripaverslunar í Austin í Texas skotinn til bana. Maðurinn sem um ræðir hét Theodore Shaughnessy og hafði hann varið ómældum tíma í að byggja verslunina upp. Erfiðið hafði skilað sér enda var verðmæti verslunarinnar sex milljónir Bandaríkjadala, um 600 milljónir króna.
Í apríl var það svo tilkynnt að sonur Theodore, Nicolas Shaughnessy, myndi taka við versluninni. Nicolas þessi er nítján ára en nú er útlit fyrir að hann muni ekki taka við versluninni. Grunur leikur á að hann og eiginkona hans, Jaclyn Edison, hafi ráðið leigumorðingja til að fremja morðið.
Hjónakornin hafa nú verið ákærð vegna málsins og eiga þau yfir höfði sér lífstíðarfangelsi verði þau fundin sek. Rannsókn málsins hefur verið umfangsmikil og er lögregla viss í sinni sök.
Það var að kvöldi 2. mars síðastliðinn að byssumaður ruddist inn á heimili Shaugnessy-hjónanna. Theodore greip til skotvopns og skaut í átt að manninum, það dugði ekki til og var Theodore skotinn til bana ásamt heimilishundinum. Eiginkona hans, Corey Shaugnessy, slapp ómeidd.
Að sögn saksóknara leiddi rannsókn lögreglu í ljós að Nicolas hafði ítrekað reynt að finna leigumorðingja til að myrða foreldra hans. Talaði hann meðal annars um það í smáskilaboðum til eiginkonu sinnar. Það sem vakti fyrir Theodore var að fá greidda tveggja milljóna dala líftryggingu og viðskiptaveldi foreldranna sem, eins og áður segir, var metið á rúmar 600 milljónir króna.
Að því er bandarískir fjölmiðlar greina frá hefur byssumaðurinn sjálfur ekki verið handtekinn.