Ilan Pappe, gyðingur sem bjó í Ísrael, hvetur Íslendinga til að sniðganga vörur frá Ísrael. Segir Pappe, í grein á Vísi sem beint er til Íslendinga, að það þurfi að senda löndum hans skýr skilaboð um að Ísrael verði útilokað frá alþjóðasamfélaginu á meðan landið heldur Palestínumönnum í hernaðarlegri ánauð.
Pappe rekur sögu Palestínu frá 1948 og talar um baráttu gegn nýlendustefnu Ísraels. Segir hann meðal annars að Ísraelsmenn hafi notað Óslóarsamkomulagið árið 1993 til að koma á óbeinni herstjórn á Vesturbakkanum og Gaza. „Palestínumenn á Gaza reyna enn að veita vopnaða mótspyrnu, og þar til nýlega jafnvel með sjálfsmorðssprengjum. Aftur á móti er trúin á sterka, óvopnaða og friðsama andspyrnu sterkari í palestínsku samfélagi, með sniðgönguna að vopni og að sú aðferð sé heillavænlegust til árangurs til að stöðva hörmungarnar (Nakbah) sem dynja á þjóð þeirra. Það er því gild ástæða til að styðja sniðgönguna, hún er rétta svarið við ákalli kúgaðs samfélags um alþjóðlega samstöðu og aðstoð í baráttunni,“ segir Pappe.
Pappe, sem er prófessor í sagnfræði, er umdeildur maður í Ísrael vegna gagnrýni sinnar á stjórnvöld þar í landi, hann bauð sig fram á ísraelska þingið árið 1999 en náði ekki kjöri. Hann flutti frá Ísrael árið 2005 eftir að rektor Háskólans í Haifa sagði að hann ætti að byrja á að sniðganga sjálfan sig. Hann býr nú í Bretlandi og kennir við Háskólann í Exeter.
Pappe segir hernámið versna dag frá degi, það eina sem virki sé sniðganga, friðsamleg aðgerð sem hafi virkað til að losa Suður-Afríku undan aðskilnaðarstefnunni á tíunda áratugnum. „Margir þeir sem upplifðu aðskilnaðarstefnuna í verki í Suður-Afríku, leiðtogar eins og Nelson Mandela og Desmond Tutu, hafa staðhæft að kerfislæg kúgun Ísraelsmanna sé mun skelfilegri en það sem þeir upplifðu á myrkustu tímum Apartheid. Sniðgangan bar árangur þar, hún ætti að bera árangur í Ísrael og Palestínu líka.“