Frambjóðendur Borgarinnar okkar – Reykjavíkur vilja að kristinfræði verði hluti af menntastefnu Reykjavíkurborgar og vill framboðið, sem er að frumkvæði Sveinbjargar Birnu Sveinbjörnsdóttur, að Gídeonfélaginu verði aftur heimilt að dreifa biblíum í grunnskólum. Gídeonfélagið má ekki koma í skóla í Reykjavík þar sem slíkt er andstætt reglum borgarinnar um um samskipti grunnskóla við við trúar-og lífsskoðunarfélög.
Í grein sem Edith Alvarsdóttir, sem skipar annað sæti listans í Reykjavík, skrifar í Morgunblaðið í dag, segir hún það ekki koma á óvart að ekki sé minnst á kristinfræði í drögum að nýrri menntastefnu. „Kennsla í kristinfræði á ekki upp á pallborðið hjá Degi B. Eggertssyni borgarstjóra og meðreiðarsveinum hans. Það sem kemur hins vegar á óvart er að fulltrúar Sjálfstæðisflokksins í borgarráði skuli hafa samþykkt að drögin skyldu send í umsagnarferli án þess að bætt hafi verið úr þessum augljósa annmarka,“ segir Edith.
Hún segir nauðsynlegt að kristinfræði sé hluti af menntastefnunni, það sé hluti af menningu landsins og það verði erfitt fyrir nemendur að skilja samfélagið ef það fái ekki að heyra biblíusögurnar í skóla. „Við teljum nauðsynlegt að kristinfræði sé hluti af menntastefnunni og teljum sjálfsagt að Gídeonfélaginu verði heimilað að gefa nemendum Nýja testamenntið. Sveinbjörg Birna Sveinbjörnsdóttir er oddviti Borgarinnar okkar og undirrituð skipar annað sæti framboðsins. Veljum kristin gildi í borgarstjórn.“