Vigdís Hauksdóttir, oddviti Miðflokksins í Reykjavík, vill að Ísland hætti alfarið að keppa í Söngvakeppni evrópskra sjónvarpsstöðva, Eurovision, ef Ísland sniðgengur keppnina í Ísrael á næsta ári. Margir hafa hvatt RÚV til að draga sig úr keppninni í mótmælaskyni við meðferð Ísraela á Palestínumönnum á meðan aðrir segja að ekki eigi að blanda stjórnmálum saman við afþreyingarkeppni á borð við Eurovision.
Vigdís var spurð á Beinni línu í dag um afstöðu hennar til málsins, hún sagði:
„Ef að það verður ekki tekið þátt í Eurovision á næsta ári, þá legg ég til að það verði aflagt með öllu. Að Íslendingar bara hætti að leggja pening í þetta. Annars verður það bara fordæmisgefandi. Ég tel að það sé ekki vilji meirihlutans fyrir því, en við getum ekki valið út eitt og eitt land sem við förum með okkar keppendur, út af einhverjum pólitískum sjónarmiðum. Ég bara hafna því. Annað hvort stöndum við með þessu Eurovision, með því peningaaustri sem það kostar, eða bara að við hættum þessu. Enga pólitík í þetta.“