Þorsteinn Vilhelmsson athafnamaður fordæmir orð Helgu Melkorku Óttarsdóttur, lögmanns og framkvæmdastjóra lögmannsstofunnar LOGOS, í aðsendri grein í Morgunblaðinu í morgun. Þorsteinn er faðir Hildar Aspar sem lýsti hrottalegs ofbeldis Magnúsar Jónssonar í viðtali við DV á dögunum.
Þorsteinn gagnrýnir harðlega ummæli Helgu Melkorku í Viðskiptablaðinu nýlega. Þar var haft eftir Helgu Melkorku í tengslum við svokallaða „metoo“- byltingu: „Við verðum aldrei söm. Við förum aldrei til baka. Það finnst mér vera sterkast í þessu. Þetta er svo mikið risamál að maður hefur næstum fellt tár við að heyra hvernig traðkað hefur verið á konum, oftar en ekki í skjóli valds.“
Þorsteinn segir að sér hafi verið afar brugðið við þessi orð Helgu Melkorku. „Hún hefur undanfarin ár verið lögmaður Magnúsar Jónssonar, sem gengur undir nafninu „Texashrottinn“, í allsherjarmálaferlum við dóttur mína, Hildi Ösp Þorsteinsdóttur, en hún birti hroðalega frásögn sína í DV hinn 16. mars sl. Þar lýsti dóttir mín margra ára ofbeldissambandi við hrottann Magnús, sem fólst í líkamlegu, andlegu og kynferðislegu ofbeldi í skjóli valds og peninga. Málaferli dóttur minnar gegn hrottanum standa enn yfir og hefur Helga Melkorka ekkert dregið af sér í vörninni þrátt fyrir að málstaður skjólstæðings hennar sé hrottalegt ofbeldi gegn konum,“ segir Þorsteinn.
Hann segir að í þessu málaferli hafi Helga Melkorka verið ötull málsvari ofbeldismanns. „Helga Melkorka hefur nýtt allar smugur í lögum og réttarfari til að koma málstað ofbeldismannsins á framfæri. Það er því mjög sérkennilegt hjá lögmanni, sem segist finna til með fórnarlömbum ofbeldis, að taka að sér vörn fyrir ofbeldismann. Gæti verið að peningar lékju þar stórt hlutverk? Á heimasíðu LOGOS kemur fram að heiðarleiki, fagmennska og metnaður sé sá grunnur sem fyrirtæki Helgu Melkorku byggist á. Eftir framgöngu hennar fyrir hönd Magnúsar Jónssonar Texashrotta gef ég lítið fyrir þau gildi,“ segir Þorsteinn.